Historia

JUVITO DA SILVA SOARES

Historia Badak Escola Técnica Informática

Atu hasoru dezafius iha mundu globalizasaun ho mudansa ba siensia teknologia iha merkadu global persija rekursu humanus nebe professional, laos deit ba sira nebe remata estudo iha ensinu superior maibe mos ba sira nebe aprende iha ensinu sekundariu atu sai peritus, professional nebe iha quantidade diak. Peritus sira ne’e persija tebes iha area produsaun, industria, telekomunikasaun, negosio, edukasaun hoseluk-seluk tan. Tamba ne’e edukasaun iha area teknika importante tebes no sira obrigatoriomente atu hafoun ka atualiza (update) siensia no halo adaptasaun ba teknologia foun nebe buras loron ba loron ho maka’as tebes nebe moderno ho inovasaun iha mundu tomak. Ho ida ne’e edukasaun sai hanesan seitor nebe vital ho estrategia hodi hamoris rekursu ema ida-ida iha kontekstu ”Investimento Capital Humano”

Minimu rekursu humano iha Nasaun oin-oin bele resolve liu husi maximiza no dezemvolve seitor edukasaun espesifiku ba nasaun dezemvolvido hanesan ita nia rai doben Timor-Leste. Tamba ne’e maka loke Escola Técnica Informática ba ema Timor oan tomak iha nivel secundaria atu nune’e bele kompete tama ba merkadu de servisu nomos atu bele kontinua ba nivel superior mesmu iha rai laran nomos iha rai liur.

Relasiona ho mehi kiik ida ne’e hanesan reasaun no kontribuisaun positiva ba prosesu dezemvolvimento, no partisipasaun ema Timor Oan iha dezemvolvimento iha nia nasaun rasik ka ho prinsipu : “Timor oan sai duni nain ba nia rain rasik”

Liu husi prinsipu sira iha leten, maka Fundação Klibur Mata Dalan ba Cooperativa no Fila Liman, Loke Escola Técnica Informática nebe halao nia atividade inskrisaun ba estudante foun iha loron 5 fulan Novembro tinan 2009 iha suco Bidau Akadiru Hun, Administrasaun Posto Nai Feto, Municipio Dili.

Hare ba avansadu ema timor oan hakarak aprende iha area informatika nebe makaas tebes Fundação Klibur Mata Dalan ba Cooperativa no Fila Liman hamutuk ho Estrutura Escola Técnica Informatica- Dili, iha hanoin atu loke liras ba iha Municipio sira iha teritorio Timor-laran.

Ho nune’e maka iha tinan Letivo 2012 ETI loke tan classe a Distancia ida iha Municipio Baucau ho area Técnico de Linguagem de Programação. No iha loron 13 Fulan Abril tinan 2012 hetan inaugurasaun ba instalasaun escola husi Sr. Vice Ministro da Educação, Dr. Paulo Assis Belo. Hodi sai hanesan Eskola distancia husi ETI-Dili.

Iha tinan 2014 Ministerio da Edukasaun Nacional, husu ba Eskola no Fundasaun atu trata ou prepara dokumentos hodi nune’e ETI-Baucau labele sai hanesan tan klasse distancia husi ETI-Dili, tamba razaun ETI-Baucau iha administrasaun Municipio seluk. Bazeia ba prinsipiu no hanoin iha leten maka Fundação Klibur Mata Dalan, diside ba klasse a distancia escola técnica informática nebe iha distrito sira, atu bele hamrik mesak no responsável ba nessesario nebe existe.